Nieuws

E pandemia di COVID-19 a crea un gran impacto riba economia y mercadonan laboral rond mundo. Aruba no ta un excepcion den esaki. Medidanan cu a wordo tuma pa controla e virus a ocasiona cu mayoria compania a haña nan mes obliga di pone un paro na (casi) tur actividad economico. Esaki a trece cune cu un gran parti di trahadonan a keda sin trabou.

E situacion aki a crea varios pregunta serca trahadonan como tambe serca dunadonan di trabou. Trahadonan tawata desea informacion tocante nan derechonan laboral, of continuacion di pago di salario y nan dianan di vakantie. Dunadonan di trabou tawata desea informacion con pa baha e cantidad di trahado cual lo reduci gastonan operacional pa asina surpasa e crisis aki.

Durante e temporada di duda y inseguridad aki, Departamento di Labor y Investigacion (DAO) a brinda asistencia na trahadonan y dunadonan di trabou. Riba e website di DAO a comparti informacion riba nos leynan laboral cu ta keda vigente durante e periodo di crisis. Por a mira tambe cu oficinanan di abogado y sindicatonan a expresa nan mes publicamente  riba e topico di relacion laboral entre e trahado y e dunado di trabou.

Un relacion laboral por yega na su fin conforme algun trayecto y motibonan cual ta legalmente regla. Mirando e preguntanan cu DAO a ricibi for di trahadonan y dunadonan di trabou por conclui cu pa un gran parti relaccionnan laboral a termina a base di acuerdo mutuo (areglo di pakete).

DAO ta desea di colecta mas informacion tocante e terminacion di relacionnan laboral desde 1 di januari 2020 y particularmente di ki forma esakinan a termina.

Pues, DAO ta haci un yamada na tur trahado cu nan relacion laboral a termina desde 1 di januari 2020 pa registra di forma digital. Akibou por encontra e link pa registra.

Informacion di tur persona lo wordo trata cu maximo cautela y ta confidencial.

Click riba e link pa registra. Bo por escoge entre Papiamento, Ingles y Spaño:

Link Papiamento:https://www.surveymonkey.com/r/Pap-DAO

Link English: https://www.surveymonkey.com/r/Eng-DAO

Link Spanish:  https://www.surveymonkey.com/r/Esp_DAO

Si acaso bo persona tin pregunta of no por registra di forma digital por tuma contacto cu Bureau Arbeidsmarktonderzoek via e-mail This email address is being protected from spambots. You need JavaScript enabled to view it. of This email address is being protected from spambots. You need JavaScript enabled to view it. of por yama riba number di telefon 5237718.

Finalmente, DAO ta informa cu den caso di un conflicto laboral por tuma contacto libremente cu departamento di Conflicto y Retiro via e-mail This email address is being protected from spambots. You need JavaScript enabled to view it. of por yama riba number di telefon 5237720 pa un cita.

E pandemia ocasiona pa e virus COVID-19 a trece un cambio drastico den nos economia y nos mercado laboral. En coneccion cu esaki Departamento di Labor & Investigacion (DAO) ta desea di haci un inventarisacion di e situacion laboral y den e cuadro aki ta aserca tur compania pa entrega un Registro di Personal COVID2020.

A base di artículo 30, prome inciso, di e Ordenansa Laboral 2013 un dunado di trabou ta obliga pa entrega e Registro di Personal (Personeelsregister) na director di Departamento di Labor & Investigacion ora cu su persona haci un yamada na e compania.

Den e Decreto Nacional Registronan di Ordenansa Laboral 2013 ta regla e modelonan di e Registro di Personal. E Registro di Personal ta consisti di tres parti, Modelo 1A, unda ta yena e personal actual trahando/registra na bo compañia riba 30 juni 2020; Modelo 1B, unda ta menciona e necesidad di personal pa e ultimo mitar di aña 2020 (di juli 2020 pa december 2020), tumando cuenta di e situacion real di nos economia y Modelo 1C, na unda e necesidad di personal pa cada proyecto specifico den e ultimo mitar di aña 2020 ta wordo menciona.

Entrega di Registro di PersonalCOVID2020 ta obligatorio pa tur compania na Aruba y mester wordo entrega den e periodo di 10 di juli 2020 te cu 9 di augustus 2020.

E forma di entrego di e Registro di Personal COVID2020

E unico forma cu por entrega e Registro di Personal COVID2020 ta den e forma digital. Desde 9 juli 2020 por download e formulario digital, Registro di Personal COVID2020, cu ta consisti di 3 pagina for di website www.daoaruba.com of www.gobierno.aw of por haci un peticion via e-mail  na This email address is being protected from spambots. You need JavaScript enabled to view it.  y DAO lo mail bo e formulario digital.

Den caso cu bo compania tin un of mas sucursal/ filiaal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. kvk-nummer 5555.0) pero tambe pa cada sucursal/ filiaal (p.e. kvk-nummer 5555.1, 5555.2 etc.).  Ta wordu pidi tambe pa indica cua trahadonan ta rouleer door di pone un strea (*) den kolom patras di e kolom “No.” ariba e formulario digital.

DAO ta informa cu ta obligatorio pa yena tur 3 modelo. Den caso cu no tin necesidad pa personal of necesidad pa personal pa cada proyecto specifico pa 2020, ta yena nihil ariba modelo 1B y modelo 1C.

Unda y con por entrega e formulario di Registro di Personal COVID2020

DAO ta haci un peticion pa hinca e datonan den e formulario digital, segun e modelo stipula pa ley, y manda nos esaki na e-mailadres This email address is being protected from spambots. You need JavaScript enabled to view it. .  

DAO lo manda e compañia un e-mail como comprobante cu a ricibi e Registro di Personal COVID2020. Tene cuenta cu si bo a entrega e Registro di Personal 2019-2020, tambe bo mester yena atrobe e Registro di Personal COVID2020.

Den caso cu e Registro di Personal COVID2020 no ta corectamente yena y DAO a comunica esaki na e compania pero e compania no a adapta e Registro di Personal, tambe ta wordo considera cu e compania ta den incumplimento.

Pa companianan cu ta haci uso di un intermediario (p.e. accountings- of adviesbureau) ta recorda nan cu cumplimento di nos leynan laboral ta un obligacion di e dunado di trabou y no di e intermediario.

Companianan cu no ta cumpli cu entrega di e Registro di Personal COVID2020 aki den e periodo menciona como tambe esnan cu no a entrega esaki e aña anterior ta den incumplimento cu articulo 30 di e Ordenansa Laboral 2013. DAO lo bai over pa tuma accion contra esakinan despues di e fecha di 9 augustus 2020.

E compania lo ricibi un sancion administrativo di Afl. 5.000,- pa no cumpli cu e obligacion di entrega di e Registro di Personal COVID2020.

Si tin mas pregunta tocante e Registro di Personal por tuma contacto cu Sra. Louisetty Croes na 5237722 of via email This email address is being protected from spambots. You need JavaScript enabled to view it. of This email address is being protected from spambots. You need JavaScript enabled to view it. of cu un funcionario di Bureau Arbeidsmarktonderzoek na 5237720.

DAO ta recorda publico riba nos instruccionnan di higiena y distancia social y ta introduci un instruccion mas, esaki en coneccion cu e ultimo desaroyo relaciona cu COVID-19.

Procedura ora cliente presenta pa cita na DAO

Cliente ta drenta cu tapaboca/mondkapje bisti, esaki ta obligatorio entrante diahuebs 2 di juli 2020. No ta permiti pa cliente drenta cu handschoen bisti y tampoco saluda cu man. E cliente ta ser pidi pa sigui nos señalnan di indicacion paden di nos oficina y pa haci uzo di nos hand sanitizers disponibel na entrada.

Conforme protocol di DVG clientenan cu tin sintoma di griep, keintura, tosamento, niester of problema cu halamento di rosea no ta wordo permiti entrada na nos oficina. Y den caso cu wordo constata cu un cliente presente tin e sintomanan menciona, nos lo pidi su persona encarecidamente pa bandona nos oficina.

E cliente ta wordo pidi pa mustra un ID na porta. Solamente un (1) persona ta drenta pa atende e cita. Si tin otro palabracion cu un funcionario di nos departamento, excepcion por wordo haci.

→ Casonan cu ta encera grupo di mas cu dos(2) trahado: Pa por cumpli cu e maneho di distancia fisico y higiena conforme protocol di DVG, nos ta pidi pa e grupo apunta un (1) of maximo dos (2) persona pa atende e cita. E persona (nan) aki mester presenta carta di autorisacion di tur trahado di e grupo y demas documentonan necesario di tur trahado.

Nos ta pidi pa publico tuma bon nota di nos instruccionnan na momento cu ta presenta serca nos pa un cita.

Pa mas informacion por sigui nos riba www.daoaruba.com of riba nos pagina di Facebook: Directie Arbeid en Onderzoek. Tambe pa cualkier pregunta por yama nos na 523- 7720 of manda nos un email na nos email central: This email address is being protected from spambots. You need JavaScript enabled to view it. .

ORANJESTAD - Departamento di Labor y Investigacion kier a participa na tur cliente cu entrante diamars 30 di juni 2020, nos ta introduci un e-mail adres nobo pa tur keho riba servicio cu nos ta brinda e pueblo di Aruba, pero tambe pa traha un cita pa asuntonan laboral den forma mas rapido.

E e-mail adres aki ta: This email address is being protected from spambots. You need JavaScript enabled to view it. .

Importante ta pa señala cu e e-mail aki ta solamente pa e topico aki riba menciona.

Si e cliente kier contesta por escrito riba preguntanan huridico of general, e e-mail existente, cu ta This email address is being protected from spambots. You need JavaScript enabled to view it. , ta keda aplicabel.

Nos ta spera di por a informa tur cliente debidamente.